ရွေးကောက်ပွဲ ဥပဒေကို ကန့်ကွက် ရှုတ်ချနေသော နယူးဒေလီမှ မြန်မာ့ ဒီမိုကရေစီ အရေး လှုပ်ရှားသူများကို ဂျန်တားမန်တား ပန်းခြံတွင် တွေ့ရပုံ (ဓာတ်ပုံ - ဇာနည်မာန်)
“စစ်အစိုးရက ထုတ်တဲ့ ဥပဒေဟာ ဒီမိုကရေစီ နည်းလမ်း မကျဘူး။ ဒီအတိုင်းသာ ရွေးကောက်ပွဲ လုပ်ခဲ့ရင်
ဘယ်လိုမှ လွတ်လပ်ပြီး တရား မျှတတဲ့ ရွေးကောက်ပွဲ ဖြစ်လာမှာ မဟုတ်ဘူး။ ဒီအတိုင်းသာဆိုရင် မြန်မာပြည်တွင်း မငြိမ်မသက်မှုတွေ ဆက်ဖြစ်နေဦးမှာပဲ” ဟု အထက် လွှတ်တော်အမတ် ၁၀၀ ကျော် ဖြင့် ဖွဲ့စည်းထားသည့် IPFDB အဖွဲ့၏ ခေါင်းဆောင် မစ္စတာ ရှရတ်ဂျိုရှီး က ဧရာဝတီသို့ ပြောသည်။
ပါတီဝင်များသည် အကျဉ်းကျနေသူများ မဖြစ်စေရဟု အစိုးရက ရွေးကောက်ပွဲ ဥပဒေတွင် ပြဌာန်းထားခြင်းမှာ ဒေါ်အောင်ဆန်းစုကြည်နှင့် အမျိုးသား ဒီမိုကရေစီ အဖွဲ့ချုပ် (NLD) ကို ရည်ရွယ်ခြင်း ဖြစ်သည်ဟု သူက ဆိုသည်။
“အကျဉ်းကျနေသူတွေ မပါရဘူး ဆိုတာဟာ ထူးဆန်းတဲ့ ကိစ္စပဲ။ ကျနော်တို့ နိုင်ငံမှာရော တခြား နိုင်ငံတွေမှာပါ ပါတီဝင်တွေ တခါတလေ ထောင်ထဲ ဝင်ကြရတဲ့ ကိစ္စတွေ ရှိခဲ့ဖူးတာပဲ။ ဒီလို ကန့်သတ်လိုက်တာကို ကြည့်ရင် ဒီရွေးကောက်ပွဲဟာ ဘယ်လိုမှ တရား မျှတမှုရှိမယ့် ရွေးကောက်ပွဲ မဖြစ်နိုင်ဘူး” ဟု သူက ပြောသည်။
ဒေါ်အောင်ဆန်းစုကြည်အပါအ၀င် နိုင်ငံရေး အကျဉ်းသားများကို ချက်ခြင်း လွှတ်ပေးရန်၊ တိုင်းရင်းသား ခေါင်းဆောင်များ၊ ဒီမိုကရေစီအရေး လှုပ်ရှားသူများ အားလုံးနှင့် တွေ့ဆုံ ဆွေးနွေးရန်တို့ကို IPFDB က မြန်မာအစိုးရကို တောင်းဆိုသည် ဟု သူက ပြောသည်။
သူက အိန္ဒိယ အစိုးရကိုလည်း တောင်းဆို တိုက်တွန်းမှုများ ပြုလုပ်ခဲ့သည်။ ဒီမိုကရေစီ စနစ် ကျင့်သုံးသော နိုင်ငံကြီး ဖြစ်သည့် အိန္ဒိယ အစိုးရသည် မြန်မာ စစ်အစိုးရနှင့် စီးပွားရေးအရ ပူးပေါင်း လုပ်ဆောင် ရုံသာမက မြန်မာနိုင်ငံ သားများ၏ အကျိုး စီးပွားကိုလည်း ကြည့်သင့် သည်ဟု သူက ဆိုသည်။ IPFDB အဖွဲ့၏ တောင်းဆို ချက်များကို အိန္ဒိယ ၀န်ကြီးချုပ် မာမိုဟမ်ဆင်းထံ ပေးပို့သွားမည်ဟု ဆိုသည်။
အင်အား ၂၀၀ ကျော် ပါဝင်သည့် နယူးဒေလီမြို့ ဆန္ဒပြပွဲတွင် ပါဝင်သည့် ပြည်ပရောက် စင်ပြိုင်အစိုးရ ပြန်ကြားရေး ၀န်ကြီး ဒေါက်တာ တင့်ဆွေက ရွေးကောက်ပွဲ ဥပဒေ အကြောင်းကို ပြည်သူလူထု သိရှိရေး ဆောင်ရွက်ရန် အရေးကြီးသည်ဟု ဧရာဝတီကို ပြောသည်။
“ဒီတိုင်းနေလို့ မရတော့ဘူး။ ကိုယ်မကြိုက်တာကို မဖြစ်စေဖို့ မကြိုက်တဲ့ အကြောင်းကို ပြဖို့ လူထုမှာလည်း တာဝန်ရှိတယ်၊ NLD မှာလည်း တာဝန်ရှိတယ်၊ ကျနော်တို့မှာလည်း တာဝန်ရှိတယ်” ဟု သူက ရှင်းပြသည်။
copy by irrawaddy
No comments:
Post a Comment